Ing Anak A Eddie
    (Apu ng Apung Ano/Pacu Diaz at 
     Apung Ciano/Sista Miranda)

ing anak a Eddie atiu ya Canada
anak neng Cong Tony at Atching Magdalena
apu neng Tang Ano at Apung Pascuala
quetang lele Tabun carin ya ing bale da

atatandanan que ing anak a Eddie
quetang malati ya't magaral cu queti
nung asaganan que't misalubung kami
ding labi na't mata, titiman la't maili

malati ya pamu balu cu ne klasi
queng cayang pangimut at laweng pasimpli
potang dagul ya iti, ngaku qng sarili
malaut ya dasnan nung yang magpursigi

ngaku, aliwa ya caring aliwang anak
malati ya pamu biasa neng mibalak
nung kaliskisan que metung ya caring ditak
kumayud yang kusa, eme man itulak

eya migkamali ing cacung pamagsuma
ining Edding Puno, tune ing guelingan na
anya itang kursung pamag-inhiniyeria
icu neng ayari queng pamibata na

at queng balita cu, maki-guenacan ya
handa yang sasaup caring kabaryu na
ngara lapitan me't nung mu ring agyu na
ena ca ibasyu, muli cang magdala

apatunayan ta ing pamaki-abe na
queng gawang marangal apanaligan ya
makalaut ya man deup ne ing palad na
qng Independence Day, saup caring matua

lubus ing bilib cu at pamagpa-puri
quening palipi na't panganeng Cong Tony
at nukarin ya man i Tang Anong manuli
ing pagmaragul na, alang pasubali

sana e magbayu ing anak a Eddie
queng pamagdake na qng ikua ng suwerti
uling tune saya at tulang alang anti
ing bie na ning pagka-e-maka-sarili

(C)opyright 2008, Anac Ning Arenas