Ing Anac A Rufina
   	
  
  Papunta Kabigting caibat na ning tabun
  Bale neng Dang Ising at i Tatang Sidung
  Anac dala di Beth, Joe, Rufina't, Pidiong
  I Perlyn at i Rod, napun pa mamialung
  
  uliran ya itang anak dang Rufina
  a mipalaut na carin qng Canada
  maragul ya suyu caring cayang matua
  maging quetang bayu ya pa mung magobra
  
  mekapagobra ya Menila qng Rustan
  kurso ng Komersiyu carin pepaganan
  detang kayang suweldo e man katalaksan
  sawa-sawa ne queng lakwatsa't imalan
  
  at sakaling sabi na mong cayang Tatang
  "kailangan que ing pera queng asikan, Inang"  
  ena mikaduan pang kailangan ng sabyan
  ilawe neng pera alang qutang-qutang
  
  malambat-lambat yang carela sinuyu
  caring pengari na't waling makabunsu
  bayu meki-asawa sinaup ya pamu
  queng kakayahan na't abut na ning agyu
  
  madalas ya namang makauli-uli
  neng aldo bakasyun bista ma't saguli
  kaligayahan nang aquit no parati
  at pagdala na lang nanu mang asali
  
  makatagun ya rin queng okasyung baryu
  anti mo neng puni, piesta at mag-pasku
  nyang misan abe de queng "Flores de Mayu"
  metung caring Musa linaban qng Tronu
  
  at meki-asawa yang kalulutang idad
  quetang Batanguenong miswuerti't mipalad
  dakal lang maglolo ding caya mighangad
  uling maganaka ya, masipag, marilag
  
  carin qng Dubai dela ne ning suwerti na
  nung nu ilang aduang miasawa megobra
  ing luho na ning bie carin atakman da
  detang sablang bague queng bie makasaya
  
              

              
                                                
                                                
        
  dapot ing suwerti na ena serilinan          
  inambunan na la detang mangailangan         
  bukas lang palad na caring kaluguran        
  detang magkasaquit agad nong susopan        
                                                
  ding bayo, kapatad, pengari't katuangan     
  detang bisang munta Dubai dela no ngan      
  kaligayahan nong caya ampanganan            
  bang ing saya ning bie atakman da naman     
                                                
  at detang mebisang karin na magobra         
  sinopan dong meintun obrang mi-asawa        
  ila ing liningun quetang kailangan da       
  anggang metanggap la't carin megdatun na    
                                                
  aguiang i Apung Ising miras niya mu naman   
  at mapilan besis ing Dubai pisyalan         
  i Pidiong, Perlyn, Rod, Melving pangunakan  
  malaut a Dubai icua deng pintalan           
                                                
  at mapilan pa mung banua ing milabas        
  carin qng Canada carin la linikas           
  mag-adua pang banua iniyang carin la miras  
  mekasali na lang bale dang matikas          
                                                
  nya ngeni carin no tinuknang miasawa        
  at carin magaral ding aduang anak da        
  palabasan mu pa ing mapilan banua           
  maging Canadian na ing istilu't galo da     
                                                
  pero makanyan man eya mangalinguan          
  anak a Rufina queng cayang pibatan          
  madalas na mu rin pang pakibalitan          
  sasaup queng baryu nung ating kailangan     
                                                
  oita'ing istorya ning anak a Rufina         
  anak da ri Sidung at Ising a miasawa        
  ninu mong sumabi quetang malati ya          
  ing kapalaran ng miras ya Canada            
                                                
                                                
	     --- ooOoo ---